faqeer ahad zargar 1

واوٕے عأرفن گوشن ژاو

واوٕے معرفتہٕ مس ہیتھ آو

واوٕے رُمہٕ رُمہٕ چُھم کران واو

واوٕے معرفتہٕ مس ہیتھ آو

واوٕے طألِب واوٕے پیٖر 

واوٕے غٲلب واوٕے اسیٖر

واوٕے دون دِلن وصلُک مِلاو

واوٕے معرفتہٕ مس ہیتھ آو

واوٕے خاکس کران بیدار 

واوٕے آب و آتش پیٹھ سوار

واوٕے وُچھم کُل شیٔ باو

واوٕے معرفتہٕ مس ہیتھ آو

واوٕے محرم شاہ مقامن 

واوٕے چُھم دِوان روحس کھین 

واوٕے ہر دِل ٲیٖننُک جلاو

واوٕے معرفتہٕ مس ہیتھ آو

واوٕے مے دِوان چُھم بودس 

واوٕے پے انان نابودس 

واوٕے ہیتھ در وجود ژاو

واوٕے معرفتہٕ مس ہیتھ آو

واوٕے اتھ ملکوتس ہوش 

واوٕے دِتھ ناسوتس گوش

واوٕے عشقہٕ وتہٕ مُشکٕہ چھرکاو

واوٕے معرفتہٕ مس ہیتھ آو

 واوٕے جبرتہٕ وایان تار

واوٕے لاہوتہٕ کٔرِتھ مِلژار

واوٕے کرتوتہٕ کُے چلے جاو

واوٕے معرفتہٕ مس ہیتھ آو

واوٕے دربار کلام اللہ 

واوٕے اسرارِ ہو اللہ

واوٕے سردارِ اذکار بنیاو

واوٕے معرفتہٕ مس ہیتھ آو

واوٕے باوان سیٖر اکرم

واوٕے ہاوان کم عالم

واوٕے چاوان ستھ دریاو

واوٕے معرفتہٕ مس ہیتھ آو

واوٕے پر گٔنڈِتھ احـد زرگـر 

واوٕے پھیران واوس اندر 

واوٕے شش کلہِ منز کٔرِتھ بساو

واوٕے معرفتہٕ مس ہیتھ آو

Shah kalandar

🌹🌹 کلامِ شاہ قلندر علیہ رحمہ 🌹🌹

ٲمۍ یآرۍ  وآجِس  لولہ  ناوے  سورِہ سامانۓ

آولنہ  لآجنس  کاژہ  گآجنس  چھس  بۆ حآرانۓ

وس  ناوِہ  پننے  سآل  کرنے  اتِھہ  ہیو  کھوٗر ھم

ھمراۓِ  خۆد  چُھئ  برونٹھہ  نَمس  پیرِ پیرانۓ

کٔلمۓ  ژہ  زانکھ  کٔلمہ  کیاہ  گو  کٔلمئے توحید

کٔلمۓ سرہ کر یۆت گژھکھ تۆت چُھئ ژہ فرمانۓ

دم  رٹھ  پانو  وۆتھ  مُژر  بر  نؠبرہ  اژھ اندر

اژھ  خوٗنِ  جگر  ژانگِٗہ  زآلِتھ  دُر  لبکھ  پانۓ

عآن تۓ غآن لیۄکھ أمۍ نقاشن دۆن چُھ کنۄئ چاو

عآنس یہ نقطچۍ چھی لٔجی ادہ گٔیس پآرزانۓ

الفس  پؠٹھہ  کنِہ  کلہ  کڈِتھ  میم  تتھۍ  پؠو ناو

الفئ چُھ میمس منز کھٹِتھ پان ژھٹہ مارانۓ

أندرۓ بۆ زآجِس تۆندرہ نارن نؠبرہ دٔز میانۍ تن

ھفتدر   بندہ   نِشہ   نیر   نؠبر   ژٹھ  سہ  زولانۓ

مؠژِہ  جامہ  ؤلِتھ  آیہ  فۆلِتھ  مؠژِہ  منزۓ گل

نۓ    روزِہ    بلبل    نۓ    گلستان    باغِ   بوستانۓ

شاہ  دیۄتُس  رۆبن  گۆوُئ   بیدار  شاہِ قلندر

دل   کر   سمندر   وحدتس   ادہ   لبکھ   نشانۓ

Rahmaan dar

🌹🌹🌹کلامِ رحمان ڈار علیہ رحمہ🌹🌹🌹

معرفت مۓ سیتۍ  بادل بؠدار گوس پرٚزنووُم سمسار

چھتیام مۆۓ یارہ وؠتہ گوم سۄ نار پرٚزنووُم سمسار

ژۆپآرۍ  ؤچِھتھ  تحقیق  کۆرُم  کیہنۓ  چُھ   وفادار

وُچُھم  پانس  نِش  خود   اغیار  خدا   چُھ   نگہدار

تمنا  چُھم  میلِہ  اہلِ  دِلا  سۄ  آسِہے  زانۍ ہؠۄند یار

بۆ حال  ونہ تس  محرمِ رازس  سۄئ  بوزہؠم  اسرار

بُنیادِ    آدم    چُھئ    لانہایت    دنیا    چُھ   ناپائدار

شِنیاء گٔژھۍتٕھئ ووتُس بہ مطلب وحدتہ لۆبمس تار

یمۍ  یتِہ پرٛزنوو سۄئ تتِہ فارغ تس نو کُنۍکۄئ بار

من  کانَ  ھٰذِہٖ  صحیح  چُھ  قران  بااللہ  چُھم  اقرار

حآرتھ   وُچھان   کوتاہ   پۆشُم   فآنی   گوس   بیزار

فِنزار  ژھنجام  سِواۓِ  ازل  درِ دست نہ کینہہ اختیار

نفَئ    اثبات    دپُن    تہ    بنُن    نَنُن   چُھئ   دشوار

خیالِ    خآمی    نقش   کھنُن   تتھ   چُھئ   استغفار

ناسوتہ   نِشہ   نِشانہ   لۆبمس    ملکوتہ   نَنِہ   اطوار

جبروتہ  نِشہ  باخبر  چُھ  رحمآن  لاھوتہ چُھم مختار

Shamas faqeer

🌷🌷🌷کلام شمس فقیر علیہ رحمہ 🌷🌷🌷

أتی روز وۄنۍ بوز سوز ییٚتی لو  لٔتی  لو 

رۄے ہاو مَے کر ژھایہِ گِتی لو  لٔتی  لو

معشوقہٕ عاشق کٔرِتَھکھ مٔتی ژھایہِ تھووتَھکھ رۆۓ

چھی دوٗرِ ہران نوٗرٕ فٔتی لو  لٔتی  لو

کامکہٕ وُچھمَکھ شامہٕ پٔتی دامہٕ لأجتَھس بو 

چھی مارِ سیاه مار کٔھتی لو  لٔتی  لو

تَس کامہٕ دیٖوس جامہٕ چٔھتی لچھ تہٕ سامانو 

گٔنزراوٕ کیٛا أنزرأوۍ مٕتی لو  لٔتی  لو

اَتھ رنگہٕ مندورِ ہَنگ چِھ رٔتی سنگ تہٕ گنیانو 

شِنیایہِ کٕنۍ دارِ بر چِھ ؤتِھی لو  لٔتی  لو 

دَمہٕ دَمہٕ دَمن دَم مےٚ ہیٚتی گوم  یکسانو 

نؠرمل مُدوَر پیٛوم أتی لو  لٔتۍ  لو

طُریا  سۄشپھ زاگرتی دوٚپنہٕ کر زانو 

شؔمس فقیرو غم کھےٚ أتی لو  لٔتی  لو

souch kral

🌹کلامِ سۆچھ کرال علیہ رحمہ🌹

جویِہ   منز   بٔسِتھ  چُھی   درۍیاو

ناو    در    آب    تۓ    آب    در   ناو

٫ژھؠن چُھس نہ کُنرس پان پرزہ ناو،

ناو    در    آب    تۓ    آب    در   ناو

یمۍسُندُئ وۆلُر چُھ تمۍسنزٔئ ناو

وۆلرس  تہ  آبس  چُھ  کنۄئ  بساؤ

واوٕہ  سیتۍ  پکان   ناو   پرٛزہ   ناو

ناو    در    آب    تۓ    آب    در   ناو

نۆقطہ  پؠو  عینس  غین پیوس ناو

غین   سپد   محرم   کۆرُن  ٹاو  ٹاو

اَمۓ    شؠچِھہ    منصور   مارنہ   آو

ناو    در    آب    تۓ   آب    در    ناو

کھارٕہ  وانہ  پؠٹھ  نارٕہ  شستٕر دراو

شستٕر   کنِہ   پؠیہ   لچھہ  بدۍ  ناو

ہانکل   چھےُ   کُنی    وتِہ    مو   راو

ناو    در    آب    تۓ    آب    در    ناو

ونہ   کۄئ   دار   تہ   ونہ   کۄئ   رَو

ونہ    سٕئ    شستٕر   مۆکلآوِتھ   گو

پانۓ     چُھ     پانس    ھوران    داو

ناو    در    آب    تۓ    آب    در    ناو

ٹھوٗلس      أندرۓ      چُھئ     جوہر

نۓ   چُھس   جسم   نۓ   چِھس    پر

ھوٗ      ھوٗ      کران      تورۓ       آو

ناو    در    آب    تۓ    آب    در    ناو

یمِہ     شایہ     قلمن     ترٚآوٕئ     رَو

تمہ     شایہ     قلمس     ژٕٹہئ    زؠو

لۆحہ   پٕٹ   قلمس   کیاہ  کرِہ  گرٚاو

ناو    در    آب    تۓ     آب    در   ناو

لٕکٔہ    ہنزِہ    لاگہ   نۓ   مو   بر   چاو

یُس   کرِہ   گۆنگُل   سۄئ  کرِہ  کرٚاو

مدٕہ وس  سۆچھٓ کرٚالہ ژکھ دٕئ ترٚاو

ناو    در    آب    تۓ   آب     در     ناو

Ibrahim kahnai

🌹کلامِ ابراھیم صاحب علیہ رحمہ🌹

یمۍ   کۆر   تحقیق   عینِ   دریا 

تس  کتہ  روٗدُئ   کیوہ  تۓ   کیا 

حؠسہ  ھوشہ  نشہ  گو    لاپروا 

تس  کتہ  روٗدُئ  کیوہ   تۓ   کیا 

عینس  نِش  چُھئ  سورُئ  عین 

نۆقطہ یؠلہ پیوس  سپدُس غین 

سۄ  تِہ   چُھئ   امۓ   نشہ  پیدا 

تس  کتہ  روٗدُئ  کیوہ   تۓ   کیا 

سِرٕ پآٹھۍ سرَہ کر گھرِہ نۆقطۓ 

نۆقطہ یؠلہ راوی چُھکھ  پۆختۓ 

صوفی   سپدکھ   سیرے    صفا 

تس  کتہ  روٗدُئ   کیوہ   تۓ   کیا 

یِنہ  چُھئ  تِی  چُھئ لآیِتھ تھاہ 

یہ وُچھکھ تتھ ونان   موجِ دریا 

دریاوٕہ  نشہ  چُھ  نہ  موج   تنہا 

تس  کتہ  روٗدُئ   کیوہ   تۓ   کیا 

رنگ  نۓ  اوس  تۓ   رنگ  کتہ آو 

رنگہ  رنگہ  کۆرہس  بے رنگ  ناو 

ھر  رنگ  چُھ  پانۓ     جا  بہ  جا 

تس   کتہ   روٗدُئ  کیوہ   تۓ  کیا 

جان  چُھئ  جہان  دل چُھئ ماہ 

آفتاب  راورن  چُھ   داہ   تہ  کاہ 

یتہ  آو  گاش  تتہ گٹہ چھنہ  زاہ 

تس  کتہ  روٗدُئ  کیوہ   تۓ    کیا 

دل   چُھئ   کباب   آتش    شوق 

ژاپن     سپدی    سنگِ     فاروق 

کیمیا        سپدی       بے      دوا 

تس  کتہ  روٗدُئ   کیوہ   تۓ   کیا 

منزل   ژٹی   ژٹی   آس    فیرتھ 

پانس    وچُھم     پان      گیرتھ 

گُدرِتھ     آمناہ       درام      تمنا 

تس  کتہ  روٗدُئ   کیوہ   تۓ   کیا 

ترکِ   ترکَس   یلہ   معنہ   بوزکھ 

یتہ  کوئ  چھوکھ   تتی  روزکھ 

دنیا        عقبا       ترکِ       مولا 

تس  کتہ   روٗدُئ  کیوہ   تۓ   کیا 

ہا    ابراھیمہ    بۆ    دپُن     تراو 

عدم   تہ   قدم    تمسندوئ   ناو 

آو     کیاہ     تامت    دراو   سدا 

تس  کتہ   روٗدُئ  کیوہ   تۓ   کیا

Ahad zargar

🌹🌹 کلامِ احد زرگر علیہ رحمہ🌹🌹

کریوٗٹھ  یارٕ  دود  پیترُن  پیوم   پانس 

لوٗٹھ    کۆرنم    دیٖنس    تہٕ    ایمانس 

زیوٗٹھ    سفراہ    کیاہ   ونہٕ   بیگانس 

لوٗٹھ    کۆرنم    دیٖنس    تہٕ    ایمانس

ینہٕ     بوٗزُم    کنہٕ    تٔمۍسُند     گُفتار

تنہٕ     ترووُم     کلمَۓ     پوٗرُم      زُنار

ژھینہٕ    کعبس   ہینہٕ   آس    بُتخانس 

لوٗٹھ    کۆرنم    دیٖنس    تہٕ    ایمانس

گَس   دیۄتنَم   بس   روٗدُم   نہٕ  رفتار 

تس  تس  کران  شش کلہِ  گۆنڈنم نار 

وَس  زأجۍنم   فان   گوم   منز  آنس 

لوٗٹھ    کۆرنم    دیٖنس    تہٕ    ایمانس

نوٗرٕ     جامۂ     لأگِتھ     چُھم     دِلبر 

گوٗر   گورٕ   چھؠس   کران  ہفت  پیکر 

حوٗرٕ     ونہٕ    وُن    شوبان    دُردانس 

لوٗٹھ    کۆرنم    دیٖنس    تہٕ    ایمانس

طوطہٕ  رنگی اتھ عشقہٕ صۆدرس  بہار 

زوتہٕ  وٕنۍ  چھ  اتھ   منز   لعل  بِسیار 

فوتہٕ   ژأرِم    مۄختس   تہٕ   مؠرجانس 

لوٗٹھ    کۆرنم    دیٖنس     تہٕ    ایمانس

یتھ    مُلکس    منز     بسان   جادوگار 

تتھ  شہرس  چُھ  پادشاه  میونُئ  نِگار 

ستھ    اقلیم    تابع     چِھ    سُلطانس 

لوٗٹھ    کۆرنم     دیٖنس     تہٕ    ایمانس

کیٖنہٕ   رٔٹۍ   رٔٹۍ   روٗدُم   دینہٕ  ڈولنس 

چینہٕ  حبشس  سیتۍ  جنگ  کرنوونس 

سینہٕ دأرۍ دأرۍ روٗدُس بہ توپ خانس 

لوٗٹھ    کۆرنم    دیٖنس     تہٕ     ایمانس

رشکہٕ  میانے  ژھؠپھ   ہیتھ   روٗد   تنہا 

تشنہٕ تھأونس زانہہ تہٕ  کۆرنم  نہٕ  تسلا 

عشقہٕ     ژوٗرن      لوگنس     طوفانس

لوٗٹھ    کۆرنم    دیٖنس    تہٕ     ایمانس

ڈنجہِ   تھأونس   نہٕ   سوران  آم  یاوُن 

رنجہِ نأونس  ژھونجہِ  دیُتنَم نہٕ درشُن 

گنجہِ   آباد   پنجہِ  دِتھ  چُھ  وآرانس 

لوٗٹھ    کۆرنم    دیٖنس    تہٕ    ایمانس

ہر   مۆکھہٕ   یَس   مۆکھ   ہاوِ   دِلارام 

کر   تس  نِش  بیوٚن  چُھ  کُفر  اسلام 

بر     مُژرِتھ     سآر     کرِہ    یکسانس 

لوٗٹھ    کۆرنم    دیٖنس    تہٕ    ایمانس

سیرٕ  سۄخنُک تیرِ پھل یس سٔنِتھ  گو

زیٖرکی تَے ہوشہٕ حؠسہٕ  نِش پتھر  پؠو

پیرٕ    فتویٰ    کیاہ     کرِہ     دیوانس 

لوٗٹھ    کۆرنم    دیٖنس    تہٕ    ایمانس 

شوقہٕ  سیتؠن نألی گوم  عشقُن  طوق 

گاہ   عاشق   گاھے   چُھس    معشوق 

احد    زرگر    مُشتاق    پأنۍ    پانس 

لوٗٹھ    کۆرنم    دیٖنس    تہٕ    ایمانس