🌹🌹کلامِ نعمہ بادشاہ علیہ رحمہ🌹🌹
نِشہ یار آسِتھ اوۓ نا ونے
أنے سرٕہ سپزٕئ نو ذات
شیشہ ؤچھۍ دلکۄئ یتھ رۆۓ ننے
أنے سرٕہ سپزٕئ نو ذات
عشقہ دریاوس پاد یس سنے
ڈٕنگ دِتھ دُر کھالِہ روزِہ حیات
آبہ منزہ نارہ دزِہ دٕہ نہ تس ننے
أنے سرٕہ سپزٕئ نو ذات
قُمیۄر پنجرس لۆگ بولٕنے
جانوار ژٹِہ جامۂ ممات
کر ترکِ ترک کیہنہ تس چھۆنے
أنے سرٕہ سپزٕئ نو ذات
فونسس منز لۆگ شمع شولٕنے
گتھ کرۍ پونپوٗرۍ لۆب تمۍ نجات
یُس دزِہ عشقہ نارہ نور تس بنے
أنے سرٕہ سپزٕئ نو ذات
لیلِہ پتھ مجنون لۆگ نیرنے
پۆر تمۍ حمدا ثناء نعت
زندہ پانہ لیلِہ لۆگ قبر پراٹنے
أنے سرٕہ سپزٕئ نو ذات
لۆگ شیخ صناع صف فٕٹرٕنے
کُفرٕچۍ ٹوپۍدِتھ لٕب تمۍ سۆ ذات
زُنار پآرِتھ بد لۆگ رچِھنے
أنے سرٕہ سپزٕئ نو ذات
فرہاد لآگِتھ کۆہ یُس کَھنے
یارہ دادِه پان مارِہ وۆتِھہ عرصات
تعشوقہ پننے جویاہ اَنے
أنے سرٕہ سپزٕئ نو ذات
زآلِتھ ٹھرۍ گژھ لگ نیرٕنے
مشتاق گژھ تس دؠن کؠو رات
گرؠند کاس پان تھاو تتہ اند کنے
أنے سرٕہ سپزٕئ نو ذات
بنِہ یَس کُنؠر نعمہ تس ونے
پننِس پانس چھےُ متابعات
ونِہ ھے کۆہن تہ روزن نہ کُنے
أنے سرٕہ سپزٕئ نو ذات
No comments:
Post a Comment