🌹🌹🌹کلامِ وازہ محمود علیہ رحمہ🌹🌹🌹
دپَن کیاہ چُھم پنُن دلبر انالحق پر انالحق پر
تپَن عشقنۍ مؠہ دۆپ یکسر انالحق پر انالحق پر
پٔرِتھ گژھ کٔلمہ لا اول بٔرِتھ پانس دِہ سۆۓ کرتل
کٔرِتھ گژھ زبح پانس مر انالحق پر انالحق پر
وۆنم دِلہ نئ دۄئی کر دوٗر سۆنُم سُئ درنقش برپوٗر
اۆنُم عشقن بجوش اخگر انالحق پر انالحق پر
دۆپُم دِلہ سئ بۆ کیاہ زانۓ دۆپُم تمۍ گژھ مٕہ بیگانۓ
وؠۆپُم نا کرؠکھ گٔیَم برتر انالحق پر انالحق پر
اژان گوس پآنۍ پانس منز پژان گآم مُلکِ دلکۍ سنز
وؠژان گوم عشقنۄئ خنجر انالحق پر انالحق پر
خبر از دل گٔیَم حآصل مَہ بر غم گژھ رۆبس وآصل
زبر گژھ فان کینہہ مو ڈر انالحق پر انالحق پر
چِلس بؠہہ روٗحسئ منز باگ شِلس پننِس ژہ پانۓ زاگ
دِلس منز باگ سجدہ کر انالحق پر انالحق پر
مۆکھۓ زان ھوَ معکُم پان نَکھۓ چُھئ نحنُ اقرب مان
سۆکھۓ فَثمَ وجہُ پر انالحق پر انالحق پر
کُنُئ بوز ژئ کُنے مو روز کُنُئ ہؠتھ گژھتہ دردُک سوز
کُنُئ تکبیر پانس پر انالحق پر انالحق پر
مرد بن کر سرافرآزی فرد بن کرتہ سربآزی
درد چُھئ کرؠکھ دِہ بحر و بر انالحق پر انالحق پر
کتَھن پَزۍچؠن ژہ مو کر ژیر متَن مُلکِ وجودس دیر
ستن جوین ژہ وچھۍ آگر انالحق پر انالحق پر
کنَن منز رٹھ ژہ سِرے حق بنن عاشق چِھ حقُ الحق
سنن ؤچھۍ پانسئ اندر انالحق پر انالحق پر
خبر چھےُ وازہ محمودس زبر منز وصلِ معبودس
مَہ بر غم، تس دپان رهبر انالحق پر انالحق پر
No comments:
Post a Comment