🌹 کلامِ شمس فقیر علیہ رحمہ 🌹
بۆ چوونس مَس تہٕ سپدُس مَس
مَسُک اسرار سنیٛوم جِگرس
کلَۓ والہٕ سَر وندَۓ قدمَس
مَسُک اسرار سنیٛوم جِگرس
وُچُھم ساقیَس مَلرؠن مَس
کران پیمانہٕ پُر جامَس
دُر یمۍ کھول سۄ چُھ مستِ مَس
مَسُک اسرار سنیٛوم جِگرس
پننے نَیِہ کِنۍ سوز بوزمَس
منہٕ چے تارِہ ساز وویمَس
رازِ دِل پرؠژھام زیٖر و بمَس
مَسُک اسرار سنیٛوم جِگرس
یمۓ نوٗرٕہ تن لٔزٕن آدمَس
سُئ نوٗر فوٚلِتھ آو کُلِ عالمَس
عشقہٕ سیتی زبان آیہِ قلمَس
مَسُک اسرار سنیٛوم جِگرس
اوٚن دِتھ وارہ ووٚن دؠۄتمَس
خوۓ چُھس صبح شام چُھس مَس
کامہٕ دیو تتے لوٚگُس دامَس
مَسُک اسرار سنیٛوم جِگرس
گسَہ گسۓ گَس دِژوم سۆرمَس
وُچُھم سۆرمَۓ سیاه فامَس
مۆختہٕ ہار گنڈُن بنیا خامَس
مَسُک اسرار سنیٛوم جِگرس
کرتام وُچھام سَر نامَس
بندرس منٛز گُلِ اندامَس
فندٕ اکہِ وچُھم منٛز جامِ جمَس
مَسُک اسرار سنیٛوم جِگرس
ہؠژامۓ زاگ زاغہ جورَس
وچُھم زال نألۍ گوٚمُت رازہ ہونزَس
دپان رازہ ہونز یِہ زال ژٹہَس
مَسُک اسرار سنیٛوم جِگرس
دوٚدُم دِل، درۍیاو دامہٕ چمَس
نۆکتہٕ اکہِ مۆختہٕ ہار بۆٹھ کھورمَس
پۆختہٕ کار رازہ ہونٛز کھوٚت بامَس
مَسُک اسرار سنیٛوم جِگرس
کٔرِتھ لا، الا اللہ دۆرمَس
نفئ اثبات موجوٗد چُھ مَس
شہوٗدہ أندرۓ سجوٗد کوٚرمَس
مَسُک اسرار سنیٛوم جِگرس
بۆ گوس شیدا تمِس صنمَس
طمع ترآوِتھ جمع اوٚنمَس
زہ لال مال حال فِدا کٔرِمَس
مَسُک اسرار سنیٛوم جِگرس
شمؔس فقیرو نوٗش کر مَس
ہوش تھأوِتھ روز بَر بامَس
دَر حرم وآتِتھ کور کُن نمَس
مَسُک اسرار سنیٛوم جِگرس
No comments:
Post a Comment