🙏صلوات اللہ علیک یارسول اللہﷺ🙏
🌹کلامِ احمد بٹواری علیہ رحمہ🌹
سر پادن کرۓ قربانہ لولو
جان وندیو جانِ جانانہ لولو
دوٗرِہ ڈیونٹھمَکھ ماہِ تابانہ لولو
جان وندیو جانِ جانانہ لولو
قدِ نازنین چون عرشہ کھۆتہ بالا
اتھ قدسئ رآضۍ چُھئ حق تعالا
چُھکھ نبین کھوتہ تھدہ شانہ لولو
جان وندیو جانِ جانانہ لولو
چُھکھ نبین مُرسلن سارنئ تاج
کھتۍ حضرت لامکان کۆرُکھ معراج
کھۆت عرشس چون نالانہ لولو
جان وندیو جانِ جانانہ لولو
ژئ ابتدا ژئ بےشک انتہا
ژئ سارنئ پؠٹھہ کنہ چُھکھ شہنشاہِ
چھم مؠہ امید تمِہ مآدانہ لولو
جان وندیو جانِ جانانہ لولو
ژۓ ناو دپان چھی سید المرسلین
ژۓ ناو دپان رحمتاً للعالمین
چآنۍ تعریف در فرقانہ لولو
جان وندیو جانِ جانانہ لولو
چون کلمۂ تحقیق گو مُرسلن
چون کلمۂ تحقیق چُھئ عاشقن
زندہ روٗدی رندہ مستانہ لولو
جان وندیو جانِ جانانہ لولو
یِم دو ابرو محرابہ کھوتہ نازنین
دۆن مُتصِل جوۓ چھےُ چین ما چین
دۆن ہلالن منز چُھئب نشانہ لولو
جان وندیو جانِ جانانہ لولو
چشمہ ڈیشتھ آھو لگۍ کزٕلۍ ون
چشمہ ڈیشتھ یمبرزل فۆجۍ باغن
چشمہ ڈیشتھ فٔلۍ گلستانہ لولو
جان وندیو جانِ جانانہ لولو
چُھم تمنا ؤچھہ ھۓ والضحیٰ روۓ
چُھم تمنا ؤچھہ ھۓ والیل موۓ
ماہِ انور تتہ مندہ چھانہ لولو
جان وندیو جانِ جانانہ لولو
نستہ خنجر چونُئ سۆن مؠہ جگرس
نیزه کھوتہ تیز وارہ زآجنم وَس
خستہ تلوارِہ دارۓ بۆ شانہ لولو
جان وندیو جانِ جانانہ لولو
خنده وُزمل قند فلۍ دند مۆختہ ہار
در دہان جرِتھ چھی لعل بازار
دُرِ شہوار دراو از دہانہ لولو
جان وندیو جانِ جانانہ لولو
اَسٕہ ؤنے ھۆنجہ منز چاہِ غبغب
پؠٹھ گوشس چھی کران عاشق شب
آبِ کوثر در زنخدانہ لولو
جان وندیو جانِ جانانہ لولو
سینہ آئینہ نازنین چآنی تن
چُھکھ سموٗر مخموٗر وۆتھراون
چُھس بۆ چونُئ سگِ دربانہ لولو
جان وندیو جانِ جانانہ لولو
بے چگونن پیدا کٔرِنۍ سآری
بود کۆرنۓ احمد بٹواری
کُن چُھ اَلآنہ کماکانہ لولو
جان وندیو جانِ جانانہ لولو
No comments:
Post a Comment