🌹 کلامِ وھاب صآب علیہ رحمہ🌹
مۆۓ ینہ چوونس تنہ گو یژکال
دمہ دمہ آدم چاونۓ
تنہ مٕژروونس گوم الفس دال
نابودس بود ھاونۓ
تؠلہ نا بود اوس مؠژ تہ بؠیہ کرال
دۓ اوس ژھاران پانہ زۓ
ھوٗ ھوٗ کران ھوونم دو خال
قالو بلےٰ پرہ ناونۓ
فرضِ دآئمہ سیتۍ گوسۓ پامال
دمن بستے بند رٹھ پۓ
پیرن وَنِہ نم زئ کتھہ زئ لال
زئ دُر دریاو ھاونۓ
ؤچھۍ تس یارہ سُند ولنۓ آم زال
زآوِلِہ زالۓ آس ہؠنۓ
بوزُم تمہ زالہ مۆکلُن چُھ اشکال
تۆت وآتِتھ ادہ ھاونۓ
أمۍ نآگۍراین وۆٹھ لآۓ پاتال
یارہ دآدۍ ہیہ مال مآرنۓ
رِندہ آسۍ عاشق تِمو رٹۍ پانژال
پونپرِس اَتِھہ شؠچھ تھاونۓ
مس چؠو عاشقو سپدی مستہ حال
وآصل سپدۍ مستانہ ھۓ
وھاب کھارو ؤچھۍ کارِ ذوالجلال
دنیا چُھئ افسانہ ھۓ
No comments:
Post a Comment