🌹🌹کلامِ شمس فقیر علیہ رحمہ🌹🌹
از عشقِ تو گوس کُشتگان
مۄے چُھس چوان مۄے چُھس چوان
موٚت یارٕ کوٚرتَھس یٔژ دیوان
مۆۓ چُھس چوان مۆۓ چُھس چوان
خُمخانہٕ بٔرۍ بٔرۍ تس چِھ کیٛا
تَمہِ کۄئ داماہ چاوِ نا
چؠنَےٕ مؠہ چُھم حأرتھ یِوان
مۆۓ چُھس چوان مۆۓ چُھس چوان
میخانہٕ أندرَۓ گوم نِدا
چنگ و رباب ساز و نوا
وصوٗل زیر و بَم چُھم وزان
مۆۓ چُھس چوان مۆۓ چُھس چوان
نغمہ و نَۓ مُطرِب جُدا
سنتوٗر سیتار سارنگا
دُکرس چَھ رۄنہِ شرونۍ شرونۍ کران
مۆۓ چُھس چوان مۆۓ چُھس چوان
اذکارِ سلطان پادشاہ
کٔلۍ زٔرۍ تَتہِ ڈیٹِھم سیٹھاہ
تَنہٕ چُھس بۆ پننُے ماز کھیوان
مۆۓ چُھس چوان مۆۓ چُھس چوان
فقرُ الفنا فناہ فی اللہ
از اِبتدا تا اِنتہا
مأرۍ مأرۍ چُھم زندگی دِوان
مۆۓ چُھس چوان مۆۓ چُھس چوان
الفقر فخری تھیکہٕ نا
والفقر مِنی چُھئ گواہ
فقر الفخر عألی مکان
مۆۓ چُھس چوان مۆۓ چُھس چوان
فقیٖرٕہ سُند بوز معنہِ کیاہ
حیأتی از کیٛو پگاہ
تِی کوٚر نبیَن ﷺ سأنۍ بیان
مۆۓ چُھس چوان مۆۓ چُھس چوان
فقیرَس پتہٕ کر اِقتِدا
شمؔس فقیٖر تی پالہِ نا
مُلتانہٕ شمس لادَن ہیوان
مۆۓ چُھس چوان مۆۓ چُھس چوان
No comments:
Post a Comment