🌹سۆچھ کرال علیہ رحمہ🌹
کتھ بوز طآلبو مو روز پتھ
گتھ کر پننے آستانۓ
وتھ سر دم زان غنیمت
گتھ کر پننے آستانۓ
پیرس پننِس سیتۍ کر بیعت
ہاوی تہ باوی نشانۓ
سنہ کھۓ کارس ننی رویت
گتھ کر پننے آستانۓ
جوۓ جوۓ چھےُ سمان وؠتھ
وؠتھ منز صدرس واتانۓ
جوئی چھ کُلِ دریاوس چؠتھ
گتھ کر پننے آستانۓ
آئینس پننِس ؤچھتہ صورت
اَتِہ ما کانہہ چُھئ بیگانۓ
اَتِہ کھوتہ کتہ چھےُ زیارت
گتھ کر پننے آستانۓ
قُلفس کۄنزِہ ہنز چھےُ حرکت
ہۆنرے کونہ چُھکھ واتانۓ
چرخس گردش چھےُ محنت
گتھ کر پننے آستانۓ
پننِس پانس مو رَچھۍ ژؠتھ
وردِش کرتو پہلوانۓ
حالہ کُٹِھہ پننِہ چھےُ مال دولت
گتھ کر پننے آستانۓ
گٹِہ زال ژانگِہ ہٹِہ کۄئ رتھ
لولہ گاش وچھہن جانانۓ
گتھ کٔرۍ پونپُرۍ یارس پتھ
گتھ کر پننے آستانۓ
سۆچھ کرال آمُت در ندامت
چِھیوو امہ چانہ نورانۓ
بنہ نۓ سیتی ؤنۍنۓ وؠنَتھ
گتھ کر پننے آستانۓ
No comments:
Post a Comment