Shamas faqeer

 #کلام_شمس_فقیر_صأب

زِندٕ  پانَے گژھہِ مرُن یے 

رندٕ سرٕ ہو سپدی کُن یے

کُن فیکُن یاد گژھہ ہؠۆن یے 

رندٕ سرٕ ہو سپدی کُن یے

اۆن لآگتھ وۆن گژھہ دیُن یے 

بیۄن نیری زگ تَےپرۄن یے

ہتھ دل دِتھ نؠرمل چُھ نۄٚن یے 

رندٕ سرٕ ہو سپدی کُن یے

یسنہٕ دَے دی تس کیاہ پرٔنُن یے  

گژھہِ آسُن پٔنِس پۆن یے

ہوٗنۍ مونِہ شوبِہ ارکھول ترکُن یے 

رندٕ سرٕ ہو سپدی کُن یے

مۆختہٕ پھلِہ گژھہِ ڈل تل ہؠۆن یے

ڈونۍ گۆلرَے وۆلُر پازُن یے

لا نہایتہٕ منزۍ نیرُن یے 

رندٕ سرٕ ہو سپدی کُن یے

اَنِہ گٹہِ گژھِ کنِہ پُھٹرۄن یے

اژھدہ پھرِ گژھہ لال کھالُن یے

ژانگہ زال رتھ ماز کھؠو پنُن یے

 رندٕ سرٕ ہو سپدی کُن یے

عشقہٕ دریاو سنہِ کھۆتہٕ سۆن یے

برونت کآسِتھ وونت کٔمۍ اۆن یے

شونت سپدِتھ دامہ گژھ چؠۄن یے

رندٕ سرٕ ہو سپدی کُن یے

یژھنہٕ برونٹٕھے گژھہِ یژھن یے 

شمس فقیرن تی یوژھ یے

گژھہِ صاحب اورَے پژُن یے

رندٕ سرٕ ہو سپدی کُن یے

ہراگاہ کُنہِ جایہِ غلطی آسہِ گٔمٕژ درست کرۍزیۆ

Shamas Faqeer

#kashmirisufizum