گلوکار #مرحوم_علی_محمد_شیخ_صأب
فقیرٕے تابہٕ وُن آفتاب چُھمَے
فقیرٕے کعبہ و محراب چُھمَے
فقیرٕے جا بجا شاہ ڈِیوٹھمَے
فقیرٕے کعبہ و محراب چُھمَے
فقیرٕے مِثلِ گُلشن آو پھۄلۍ پھولۍ
فقیرٕے رنگہٕ رنگَے جامہٕ ؤلۍ ؤلۍ
فقیرٕے وصلہٕ شیٖشن اصلٕکُے مَے
فقیرٕے کعبہ و محراب چھمے
فقیرٕے دردٕ پوشن مُشکِ عنبر
فقیرٕے گرد گوشن منز چھ زیور
فقیرٕے کردٕ روشن ساعت سمے
فقیرٕے کعبہ و محراب چُھمَے
فقیرٕے ژون دِلن منز باگ شولان
فقیرے دوٗن شهَن اندر ؤلِتھ پان
فقیرٕے شؠن حدن أیینہ چُھمَے
فقیرٕے کعبہ و محراب چُھمَے
فقیرٕے صوٗرتن وُچھمَے بہادوٗر
فقیرٕے سیٖرتن نورُٗ علی نور
فقیرٕے حأرتن گوس دمہٕ دمَے
فقیرٕے کعبہ و محراب چُھمَے
فقیرٕے عألمَن چُھ علمِ دفتر
فقیرٕے طألبن چھم تاج برسر
فقیرٕے عأملَن اعمال نامَے
فقیرٕے کعبہ و محراب چُھمَے
فقیرٕے پیشواۓ گنجِ اسرار
فقیرٕے رہنماے لولہٕ دربار
فقیرٕے پادشاہے لوح و قلمَے
فقیرٕے کعبہ و محراب چُھمَے
فقیرٕے صاحبِ اسرار ابرار
فقیرٕے بیمہٕ روٚس طمعس کران لار
فقیرٕے میٖمَن دوٚن منز بٔستھ حَے
فقیرٕے کعبہ و محراب چُھمَے
فقیرٕے جاۓ گیٖر چھم یتھ وجود
فقیرٕے شہد و شیٖر ہیتھ با سرودس
فقیرٕے پاۓ در دار زیٖر و بمَے
فقیرٕے کعبہ و محراب چُھمَے
فقیرٕے ہوٗ وُچھم از ہا نیبر دراو
فقیرٕے روح بٔنِتھ میانس مٔرِس ژاو
فقیرٕے نوح نبی یتھ ناوِ چھمَے
فقیرٕے کعبہ و محراب چُھمَے
فقیرٕے اوس فقیرے روزِ باقی
فقیرٕے چھم دِوان مَس ہمچو ساقی
فقیرٕے نامِ مولا در جام جمَے
فقیرٕے کعبہ و محراب چُھمَے
فقیرٕے احؔد زرگر چُھے ژے دَر بَر
فقیرٕے جلوہ ماران أندرٕ نیبَر
فقیرٕے لَلہٕ ناوتن رُمہٕ رُمَے
فقیٕرے کعبہ و محراب چُھمَے
#kashmirisufizum
No comments:
Post a Comment