🌹کلامِ محمود گامی علیہ رحمہ🌹
کیاہ ونہ آدم بُتِھہ یکسانس
پانۓ پانس وُچھنے دراو
”فثم وجہٗ وُچھ منز قرانس“
پانۓ پانس وُچھنے دراو
ہنِہ ہنِہ تیلتھ چُھٸ انسانس
اکوٸ آسِتھ لچھ چُھس ناو
کیاہ گژِھہ معلوم أمِس نادانس
پانۓ پانس وُچھنے دراو
فالو مُژرِتھ چُھ حُسنکِس وانس
چُھٸ خد و خالس تہندِس باو
درجاہ دیوتنۓ حضرتِ انسانس
پانۓ پانس وُچھنے دراو
لامکان جاۓ چھنہ پیٹھ آسمانس
قلوب المومنین عرش آو
ننۍ پآٹھ وُچھمس سورِ سامانس
پانۓ پانس وُچھنے دراو
پروا نہ کآنسہ ہند تس پروانس
مجلِسہ منز پان زالنِہ آو
نارہ منز ڈیونٹُھن نور شبستانس
پانۓ پانس وُچھنے دراو
پانۓ چُھ جام بران پیمانس
پانۓ چُھ ونان داماہ چاو
پانۓ چُھ سآلک مآلک میخانس
پانۓ پانس وُچھنے دراو
محمودؒ چُھ رآضی تس انسانس
یس نِشہ فیض تہند جآری دراو
تَوۓ ٹوٹھ سۄ حقِ سبحانس
پانۓ پانس وُچھنے دراو
No comments:
Post a Comment