🌹کلامِ احد بٹ علیہ رحمہ🌹
صفت چُھئ ذات اندر جانس
یہ کتھ بوزنۍ تگیاہ خامس
یہ خاصن پۓ تِہ چھا عامس
یہ کتھ بوزنۍ تگیاہ خامس
ژٹِتھ پردئے بنکھ محور
ژہ ؤچھ الفس چِھ میمکۍ پر
لؠکِھتھ یارن دِتُم نامس
یہ کتھ بوزنۍ تگیاہ خامس
کنۄی زآنتھ ژہ کر سجدہ
توَۓ منصور سپُن فلواہ
تمی کۆر نوش تتھ جامس
یہ کتھ بوزنۍ تگیاہ خامس
تمی زون شؠن ہندوی اسرار
تمِس پیو کریوٗٹھ عشقن بار
تمِس گو لوٗٹھ آرامس
یہ کتھ بوزنۍ تگیاہ خامس
سٔمِتھ غآفل ژۆپآرۍ آۓ تس
دِتُکھ فتویٰ تمِس مارنس
شرع پولُن تہ کھۆت دارس
یہ کتھ بوزنۍ تگیاہ خامس
مؠہ دردن زآلۍ دارِہ تۓ بر
ولو احد بٹ یہ مَردن پر
تِہ چُھئ معلوم سیاہ فامس
یہ کتھ بوزنۍ تگیاہ خامس
No comments:
Post a Comment