🌹 کلامِ عزیز بحراری علیہ رحمہ🌹
روشِہ کرۓ پوشہ وتھرُن ئے
روز دماہ بوز ونہ وُن ئے
خونِ جگر دِمہ یو چُن ئے
روز دماہ بوز ونہ ؤن ئے
عشق یؠلہ گو تس ذاتِ پاکس
لول بۆرنۓ شاہِ لولاکس
نورہ پننے وۆپدووُن ئے
روز دماہ بوز ونہ وُن ئے
الف اوسۄئ کُنرس مشغوٗل
میم دۆپنس سپدُئ وصول
کُس آئینہ کُس چُھ وُچھہ وُن ئے
روز دماہ بوز ونہ وُن ئے
سِرِ وحدت آو در کثرت
کثرت ژۓ زان عینِ وحدت
موجِ دریاو رنگہ رنگہ نُن ئے
روز دماہ بوز ونہ وُن ئے
کیازِہ فیران چُھکھ ژہ جہانس
نحنُ اقرب چُھئ نِشہ پانس
گژِھہ چشمو پرزہ ناوُن ئے
روز دماہ بوز ونہ وُن ئے
جایِہ پننے روزتس زآگِتھ
روز پانس دوٗربین لآگِتھ
سرہ سپدی ہؠرِہ بۆن کُن ئے
روز دماہ بوز ونہ وُن ئے
یتِہ دردُک صدا گو گوشن
تتِہ سورُئ سپدی روشن
تتِہ وِردس فیش گژِھہ دؠۄن ئے
روز دماہ بوز ونہ وُن ئے
نۓ چھ تسبیح نۓ تور زُنار
کُفر اسلام تتِہ چُھنہ درکار
منز کعبس سجدہ گژِھہ دؠۄن ئے
روز دماہ بوز ونہ وُن ئے
یُس تار لبِہ عالمِ آبس
دۄستتھ مِلت تتِہ میلۍ خوابس
روٗد کُنۍسئ لسُن بسُن ئے
روز دماہ بوز ونہ وُن ئے
عزیز بحرارِہ مس چؠو پیالَو
غیب الغیب چھی یِم آلَو
عشقِ پنہاں مُشک گژِھہ ہؠۆن ئے
روز دماہ بوز ونہ وُن ئے
No comments:
Post a Comment